Ih sog’s eich, mir geht’s, däis is nit noamal! Mit meine fümfadreissg Joa kimm ih mir via ols wia-r-a Pensionist: Kua Zeit nit, imma intaweign, seinti nit vaschnaufn. Däis muiss der Stress sein, van däin hob ih scha in Feansehn gheat.
Aonheibm tuits in der Fria, wou ih zeitig uma neini scha aus’n Beitt aussihupfn muiss. Gwaond aonleign, a bissl kampln – und oft muiss ih mih scha tummln, dass ih nit z’spout ins Kaffeehaus kimm. Sist sein eippa d’ frischn Seimmln aus und ih muiss aon an oldbochanan Brod kiefln. Waonn däis possiert, oft is gfahlt und ih geh beissa goa nit ins Aomt.
Duat muiss ih mi eh vöülli jedn Tog giftn, wal olleweil da Kaffee goa is und kuana wül der Letzte gwein sein. Und in Woatezimma huckn eitla zwuanzg damische Bittstölla, däi wos deiswegn daherkemma sein, dass s’ mir in Rest van da guidn Laune austreibm tua. Mih wundats scha laong niama, dass ih mih in die zwoa Stund Pause z’Mittog nit so recht dafaongan kaon. So wia gäista – und heint. Af däis aufi kaon ih d’Oawat uanfoch niama daloadn und ih muiss in Wiatshaus huckableibm. Dass owa kuana sog, i tui lanzln! Däis Zeitungleisn is a gaonz a wichtiga Beitrog fia d’meinschliche Büldung. Und kuana is sou gschwind ban Kreizwoatreitslläsn wia-r-i. Wal afs Tempo wiad Weat gleig in Aomt!
Hiatz frog ih mih nur, wiasou däi Muam dou drein olleweil za mir heaschaun tuit? Wos wüll däi van mir? Hiaz fachlts ah no mit der Haond und locht mi aon ols wia... A sou a Grahschreika! – Iagandwia kimmts mir jo bekaonnt via. Hechstwoascheinlih is ihr Aonsinnan eh nur a aomtlihs. Ih kaon däis goa nit leidn, waonn d’Leit glaubm, sei kinnan in Parteienvakea af d’Stroßn oda goa ins Wiatshaus valeign.
Dou, hiatz steht s’ auf und wiad mih gleih um iagandwos aonraunzna! Ih schau, dass ih weitakimm. – Sou wos, had, wia däi hinta mir her kiart! Hiaz muiss ih ah no lafn, däis steht an Beaomtn owa wiaklih nit guid aon!
Ih muan, hiatz is furt. In Heagoutt sei Daonk, fia meine schnölln Haxn! Wea bitte kaonn deis gwein sein? Ih keinn deis G’sicht van friacha her. Jessas! Ih hobs! Däis woa jo mei Muida! Hiatz muiss ih mir wieda aonlousn dass ih as gaonze Joa iwa nia aon sie denken tui und kuan Zeit hob fia säi. Dabei bin ih no aon an jedn halichn Obnd mit uana Litafloschn 4711 daheakemma. Wos glaubt s’ da, wos sou a Beomta in gaonzn Tog iwa tuit? Oani insan unermüdlichen Einsotz warat der Stoot scha längst ban Teifl, däis kinnt ´s mir wirkli glaubm! Und däis dazöhl ih ah meina Muida – aom nächstn halichn Obnd!
Himmel schau owa - Marlene
Harmtodt-Rudolf
Säi sogn
däi va ins
woarn a dabei
säi we(rd)n olliwal sogn
wann däi va ins dabei woarn
hobns schuid
säi we(rd)n olliwal wieda sogn
wal mia va däi sein
hobn mar ara schuid
säi we(rd)n olliwal sogn
daß mir olliwal
za däi wos schuid hobn
dazuighe(ar)n we(rd)n
Säi sogn
oana
muiß
schuid hobn
s wetta schwoab loam
in die ausgfoahranan Weg
eini und aussa
und säi zischln
und säi riafn
und säi schrein
ins neiche ruaßflankal
ins gsicht
erbsind bleib erbsind
haliga johannes schau owa
Lyrikauswahl – Gerhard Altmann
d scheibtruchn faungdz moagnliachd ein
i schitts in kölla und ind heazkaumma
da heabst stöt is föö auf
wias hiniche eichkatzl sein schwaf
valiad hoa um hoa
-----
da haun krahd
owa heid wiaz ned höö
d’ogfoinan rosnbladdln
sans anzige moagnrood
wia bsoffene laana die baam
am haung
i bod im neiwl
-----
D eichkatzln hupfm vom freibod
In fridhoof
Und huinse di eindiadn heazal vodi dodn
Do kramz und knisdadz
Inda gfruanan lufd
-----
d bsoffane gusti is gschdoam
d aumschln rafn untan vauwe guif
und es waahhd an eingl aus schneestaub
iwan himmü
inda nochd
heasd jedn hund huaschtn